Вай мехкара ДЦП дола 20 бер Москве дарба деш хургда
«Вахарга бода никъ» яхача Паччахьалкхен Дума депутат волча БӀарахой Бек-хана вӀашагӀбеллача, «ЦаӀ йола Росси» яхача ВПП, республикерча кулгалхоша хьаллоацаш дӀахьоча боламега гӀолла Москверча «Берал» яхача моттиге дегӀа могашал меттаоттаеш хургда укх бетта вай мехкара ДЦП дола 20 бер.
Из хоам «Сердалога» бир гӀо лоаттадеча юкъарча штабе. Цхьадола бераш цига хьалхара долхаш дац, цига яьккха ха унахцӀенон пайда беш хиларга хьежжа, чӀоагӀа раьза долаш долх цига шозлагӀа, иштта раьза болаш ба цар ноаной. Хьалха санна, БӀарахой Бек-ханагара планшеташ, царца лелаю лергехйоахкоргаши, карташи кхаьчар берашка, хӀаьта цар ноаношта 200 эзар сом ахча делар.
«Укх мархий бетта цул дезагӀа фу хургда?!. Цунна баркал ала дешаш таац тхона, Дала дуккха а хулийталба вай къаман юкъе из БӀарахой Бек-хан санна бола кагий нах», - аьлар берий ноаноша.
