«Карагӏдаьннарех» яха орден вай мехка хьакхелла 29 шу дизад
1997-ча шера маьтсела бетта 12-ча дийнахьа Гӏалгӏайчен хьалхара Президент хиннача Овшанаькъан Руслана «Карагӏдаьннарех» яха орден - паччахьалкхен совгӏат юкъедоаккхача каьхата кулг яздир.
Тӏехьагӏа, Халкъа Гуллама бокъонца, дӏачӏоагӏдир из гӏулакх «Гӏалгӏай республикан паччахьалкхен совгӏатех» йола бокъо хьаоттаеш. 1997-ча шера аьтинга бетта 5-ча дийнахьа исторе эггара хьалха из орден луш белгалвир Овшанаькъан Ӏаддал-Хьамид.
Гӏалгӏайчен хӏама тоадара тӏехьа хьинаре къахьегаш белгалбаьннарашта луш совгӏат да «Карагӏдаьннарех» яха орден. Дешара, ӏилман, экономикан, унахцӏенон, спорта оагӏонашца толам баьккхарашта луш я из тахан. Маьлха хьарака гонахьа дотув улл, дошох тара бос болча кхоачамца тоадаь. Ялх са болча седкъа хьисапе йолча ордена белгалду сага толам боарам боацаш хила йиш йолга.
Хӏаьта эггара лоархӏаме я ордена юкъера моттиг. Маьлха хьисапе кхо зӏы йола хьарак латт ордена юкъе. Дошох тара лепаш хиларо белгалду къаман вахаре бехктокхаме къахьегаш, доккхача дикашка кхача гӏерташ къахьийгараш массахана бовзаш хургболга.
