Саг вийнача 42 шу даьннача Гӏажарий-Юртарча вахархочунна ворхӏ шу суд йир
2010-ча шера саг вийнача Гӏажарий-Юртарча 42 шу даьннача вахархочун гӏулакх къоастадеш хилар Шолжа кхален суде. Из хоам «Сердалога» бир мехкарча Прокуратуран зарбан болх лелабераша.
«РФ УК 4-ча даькъа 111 ст. (сага вахар хадаш доккха зулам дар), 1-ча даькъа 222 ст. (бокъо йоацаш ший цӏагӏа герз, иштта цунцара хӏамаш лелаяр) бехктокхаме озаш ва из саг.
2010-ча шера наджгоанцхой бетта, хьалхагӏа герз теха ше цу сага лозаваь хилар цунна юхадекха дагадехад цунна. Бакъда, травматически оалача тепчаца цо яьча човнах, вож цу дийнахьа веннав дарбанче. Цул тӏехьагӏа, ӏаьдалах ведда кӏалхарваьннав зуламхо.
15 шу даьнначул тӏехьагӏа, 2025-ча шера кӏимарса бетта из дӏалаца аьттув баьннаб ӏаьдала болхлой», - дийцар «Сердалога» мехкарча Прокуратуре.
Цул совгӏа, цун цӏагӏа чухьежача ӏаьдала корайир Макарова оала тепч, цунца бархӏ поатрон. Шолжа-Шахьарерча Ленина цӏерах болча урамерча цӏагӏа улладаьд цо герз. Набахта валла ворхӏ шу суд йир зуламхочоа.
