Шахьара администраци Наьсаре рейд дӏахьош хилар
Йоалаца, къахьегама оагӏонца дувзаденнараш боаггӏача боараме лорадеш дий хьожаш, болх дӏабихьар Наьсаре. Из хоам «Сердалога» бера шахьара мэре болхлошкара.
«Шахьарерча хӏама йохкача моттигашка рейд дӏаяхьа арабаьлар администраце, прокуратуран, Роспотребнадзора, Федеральни йоалах йолча моттига, къахьегама гӏулакхех йолча министерствон болхлой», - йоах тхога бенача хоамо. Наьсарерча 50 тика чугӏолла чакхбаьлар рейд дӏахьораш. Цигара болх ӏаьдала бокъоно дӏадеххача тайпара тоабаь бий хьожаш хилар уж, деррига хьатохкаш.
Хӏама йохкаш вола 20 саг йоал дӏателача моттиге дӏаязваь вац, хӏаьта 12-не моттигерча къахьегама гӏулакхаца дувзаденнараш чакхдаьхадац. Гучадаьнна кхоачамбоацараш меттадоаладе, аьнна, кӏир ха елар болх дӏахьорашта, нагахьа из хӏама теркал ца деш дуте, тикаш дӏакъовларгья, аьнна, хьалхадаьккхар. Хӏама йохкарца дувзаденнараш боаггӏача боараме тоадаь латташ хила деза.
