Гӏалгӏайчен ЦТКиКИ артисташа совгӏат дир Жӏайрахьа кхален бахархошта
Гӏалгӏайчен хозача лоаман моттиге уллача Жӏайрахьа кхален культуран Цӏагӏа концерт хилар; театра, кинон, вай заман тароний Центра артисташ дакъа а лоацаш. Из кхетаче дӏахьош хилар бахьан долаш, вӏашагӏкхийтар моттигера бахархой, кхален хьаьший. Царна дицлургдоаца цӏай хилар цох. Жӏайрахьа кхале дика цӏи хеза я; ший хозача, сийлен моттигашца, ӏалама баьццарча аренашца, бӏаьшерашка денз латтача гӏалашца. Из деррига сурт дар культуран кхетаче дӏахьош го йиш йолаш.
«Артисташа гойтар хьажа баьхкача наха хоза вӏашагӏъелла программа, цо къаьгга белгалйир къаман культура. Сцена тӏа баьлар ЦТКиКИ солисташ Эккажанаькъан Роза, Пхьугӏой Амир, Олиганаькъан Марем, Беканаькъан Хади. Царех хӏаране ший программан дакъа гойтар, хьажа баьхкараш гӏадбугаш дар концерт. Цига керттера дакъа дӏалоацаш дар пандараш, зурмаш. Гобой локхаш яр Оздой Лейла, чӏондарг лекхар Ӏарпенаькъан Хьавас. Иллиалархой дийна оаз екаш хиларо программа тоайир, дукхача оагӏорахьара из го таро хилар. Концерт дӏадихьар, «Пушкински карта» яхача программа чудоагӏаш. Цо таро лу кагирхошта, къонача наха культура, искусство йовза, концерташка, спектаклашка аха», - аьлар «Сердало» газетага ЦТКиКИ зарбан болх лелабераша.
Жӏайрахьа бахархоша, хьаьшаша накъавоаккхар хӏара артист; дукха тӏоараш детташ, цар говзал лакха хилар белгалдеш.
