Гӏалгӏайчен Паччахьалкхен филармоне артисташа толамаш гойтар Москве
«Вай - Росси» яхача федеральни программанна чубоагӏаш хинна, «РОСКОНЦЕРТ» ФГБУК кхоачашбеш бола гастролей бӏал дӏахохьош, Гӏалгӏайчен Паччахьалкхен Хамхой А. цӏерагӏча филармоне артисташа толамаш гойтар Москве. Цар концертни программа дӏайихьар «Меридиан» яхача культуран, искусствай Центра сцена тӏа. Москве бахача наха дика тӏаийцар Гӏалгӏайчера кхоллама коллектив. Концерта программо Кавказа эггара хозагӏа йолча культуран оагӏонга кхоачабир хьажа баьхкараш.
«Хьалхале лелаеча вокалисташа дӏааьлар лирически къаьнара композицеш; иштта укх заман кхоллама иллеш; халкъа хьинар, денал, лоамаш хестадеш дола иллеш; халхараш дир. Цига дакъа лоацаш хилар Россе халкъа артистка Янданаькъан Тамара, Гӏалгӏайчен халкъа артистка ӏаьленаькъан ӏайна, Мусенаькъан Алина, Овшанаькъан Зара, республикан цӏихеза артисташ Беканаькъан Рахьман, Йовлой Хьава, Олганаькъан Марианна, Харсенаькъан Марем, Акхасаганаькъан Мовсар; инструментальни «Дега оаз» яха рок-тоаба; Паччахьалкхен филармоне «Гаргареи» яха халхара ансамбль. Концерта программа дӏахьош яр Овшанаькъан Зара, Хьоашаланаькъан Ахьмад», - аьлар «Сердало» газетага филармоне зарбан болх лелабераша.
«Меридиане» дӏайихьа концерта сайре лоархӏаме яр «Вай - Росси» яха проект кхоачашъяра. Паччахьалкхен филармоне артисташа цӏаькха а хьагойтар Гӏалгӏайчен искусство - ший тайпара дийна, сийрда тӏехьале хилар. Гӏалгӏай артистий гастролей бӏал дӏахо дӏахьош ба Россе мехкашка, кердача шахьарашка, къаман сердал луш.
