Дона-тӏарча-Ростове шоай говзал йовзийташ хилар вай Паччахьалкхен филармоне артисташ
«Тхо - Росси» яхача федеральни программага гӏолла, боккхача мехка моттигашка гобоаккхаш, шоаш дӏабовзийташ ба вай Паччахьалкхен филармоне артисташ. Тахан уж кхаьчаб Ростоверча «Ростельмаш» яхача культуран Двореца сцена тӏа. «Бека пандар, ека оаз» яха концертни программа гойташ ба артисташ цигарча бахархошта.
«Ростова бахархоша чӏоагӏа безаме, хоза тӏаийцар тхо. Гӏалгӏай меттала дола Даьхенцарча безама хетадаь иллеш, халхараш гойташ бар артисташ, шоай мел йола говзал ураоттаяь. Зале баьгӏарашта юкъе хинна вай къаман нах бӏаргаш доагаш, доаккхалца тхо довза хьожаш бар, гӏалгӏай къаман культура яйзар ростовчанашта», - дийцар «Сердалога» филармоне зарбан болх лелабераша.
ФГБУК РОСКОНЦЕРТо гӏо дарца Гӏалгӏай къаман йӏаьхий культура яйзар йоккхача шахьара бахархошта. Къаман ӏадаташ, оамалаш чулоацаш программа я «Бека пандар, ека оаз» яхар. Мукъамга, халхарга гӏолла; шоай къаман ӏадаташцара хьаьша тӏаэцар, лоалахой безар, истори лархӏар довзийта аьттув бар артистий. Гастролаш кхы а дӏахохьош, кхыйолча шахьарашка болхаш, чакхбала кийчлуш ба уж тахан.
