Паратхэквондох йолча Brazӏl Open яхьера дото майдилг яхьаш цӏавера Яхьяевгӏар Билал
Бразилерча шахьаре Лондрине дӏайихьача (дегӏа маьжнаш лерттӏа болх беш йоацарашта лаьрхӏача) тхэквондох йолча Brazӏl Open ВТФ-ПОДА турнирера Российски сборнена дото майдилг яхьаш цӏенах кхийтар вай мехкахо Яхьяевгӏар Билал.
«Сердалога» цу оагӏонцарча Министерствера кхаьчача хоамах, 80 кг дозал дарашта юкъе (класс К 44) белгалваьннав вай мехкахо. Юххьанца денз, ше лакха говзал йола спортсмен волга дӏагойта аьттув баьлар цун. Бразилерча паратхэквондистел котваьлар из цу яхьашка.
Дошо майдилгага кхача Россерча спортсменаца гӏорта везаш вар Билал цу дийнахьа, бакъда цун дегӏа хьал дика ца хиларах, дӏахо кхы а лата оттар цун унахцӏенон зе деш хилар кхераш, из кхове лаьрхӏар тренераша.
Дунен яхьашка Билал дикка белгалваьннарг лаьрхӏар цига. Дото майдилг яккхарал совгӏа, лерхӏама баллаш хилар цун. Из дикка накъадаргда цунна 2028-ча шера Лос-Анджелесе дӏадахьа лерхӏача Паралимпийски ловзарашка.
