Китай мехкара бизнес сихагӏа хьакхоачаргйола никъ лехар Гӏалгӏай мехка
Гӏалгӏайчен предпринимателаш таронаш йоаржаеш ба, КНР мехкара бизнес сихагӏа вайцига хьакхоачаш хургйолаш. Цӏерамашина наькъ тӏа «Мухь кхухьа экспресс» Россе почтагара яхача новкъа гӏолла товараш лоаттадергда. Каст-каста цу тӏагӏолла транспорт лелара аьнна ӏобиллача наькъо вӏашагӏхотт китайски Хуньчунь-Шахьар, транспортно-логистически «Белый Раст» яха Подмосковьера центр, цигара мухь сиха дӏахьу кхача безача моттигашка, яхаш, дийцар «Сердало» газетага Гӏалгӏайчен Паччахьалкхене.
«Кердача транспортни наькъо моттигерча компанешта хьалхашка керда таронаш хьаелл. Гӏалгӏайчен бизнеса вӏаштӏехьдоал Китай мехкара хьадахьаш дола товар сиха нахага дӏакхачийта. Цо таро лу вай доалахьара хӏама леладерашта хьежаш хилар дикка лаьгӏде, дӏадодар чухьнахьа хилийта. УФПС говзанчаша хьехамаш ду бизнеса уж наькъаш леладара, дӏахо одача хана уж хьалаш дегӏадоагӏаргда юкъера юкъ лоацъеш хиларах», - аьлар Гӏалгӏайчен, Федеральни почтан бувзама моттигерча урхаллен кулгалхочо Гаьгенаькъан Ислама.
Хьалаш хьакхелла хилара керттера дакъа да, хӏама сиха цигара хьада таро хилар - Китая доазон тӏара Подмосковье кхоачаш дӏалоаца ха я 11 ди-бийса. Хьалхарча ах шера цу наькъ тӏагӏолла эзараш совгӏа контейнераш дӏайихьар. Из никъ дика мегаш ба электроника, барзкъаш, когагӏирс, кхыдола наха деза товар лоаттадара.
