Вай мехкара СВО доакъашхой дарба де йиш йолаш хургба 12 моттиге
Россе Вахара оагӏонцарча ганза дегӏа могашал меттаоттаеча моттигашка шоай унахцӏенон хьал тоаде йиш йолаш хургба вай мехкара тӏема операце доакъашхой. Мехкарча 12 моттиго из аьттув лу тахан.
«Бокъонга диллача, санаторешка, курорташка шоай могашал меттаоттаеш ха яккха йиш йолаш ба тӏема доакъашхой. Россе Вахара оагӏонцарча ганза хьаллоацаш, укх шерарча наджгоанцхой бетта денз, шоай билеташ кийчдеш болх дӏаболабе аьттув ба цар. Цига водаш волча сага Госуслуги яхача портале, е МФЦ гӏолла республикерча СФР оагӏон моттиге дехар чудала деза эггара хьалха. СВО доакъашхо дарба деш хиннача моттигага гӏолла чуэцаш да из дехар. Цул совгӏа, санаторе-курорте дарба эш аьнна соцам баь каьхаташ хила деза цунга. 057/у оагӏонцара каьхат да из, иштта 070/у оагӏонцара санаторе-курорта дарба эшилга белгалдеш йола справка хила еза», - дийцар тхога мехкарча СФР.
«Цига дӏахьожавеш волча сага дегӏа хьал довзийташ дола каьхат да керттердар. Нагахьа хьалхагӏа чакхваьнна веце, заӏапхо ва аьнна каьхат деце, дегӏа могашал меттаоттаеча моттиге чакхваьккхе, хьаязду цунна эшаш дола дарба. Россе Турпала цӏи йола, хьалхарча тоабан заӏапхо вола тӏема доакъашхо, аргӏа хьакхачарга ца а хьежаш, чакхвала аьттув болаш ва цу моттиге», - дийцар тхога мехкарча СФР оагӏон кулгал деча Йовлой Зубейрас.
