140 совгӀа юкъарлон викалаш хургба ГӏалгӀай мехка хоржамаш дӀахьош тӏахьожаш
ГӏалгӀай мехка хоржамаш дӀахьош, Юкъарлон палатера 140 саг хургва тӀахьожаш, цар тер-калдергда закон лорадар.
Семинарашка дӀабахача цар Ӏомаяьй балха говзал, царна дика ховш да кхадж тоссача дийнахьа цхьоагӀо хилийтар, цига хьабаьхкача наха юкъе нийсденна цатоамаш юстардахара де дезар.
«Маьцхали бетта, кийчон доакъашхой къамаьл хилар «Юкъарлон тӀахьожама» Ассоциаце кулгалхочунца, Россе Президента чуйоагӀача Совета доакъашхочунца Брод Александраца. Кхетаче йолаш дийцар юкъарлон тӀахьожама декхараш, хоржамаш дӀадахьарах, цул совгӀа белгалдир цу деношка хила тарлуш дола харцахьара хоамаш, цатоамаш юкъедалар. Юкъарлон тӀахьожамхой бац белггала болча кандидатий е политически парте хьашташ кхоачашдеш. Уж хоржамаш дӀахьоча даькъ тӀа дӏахьожабаьб нийсхон тӀехьа болх дӀахьоргболаш. Уж ба хоржамашта тӀехьа хьажа безаш», - аьлар «Сердало» газетага ГӏалгӀай Паччахьалкхено.
Белгалду, вай мехка хоржамаш дӀахьоргда кхаь дийнахьа. Хоржамий доакъош болх беш хургда 18, 19, 20-ча деношка. Республикан бахархоша кхадж тоссаргба Россе Паччахьалкхен Думан ийслагӀча кхайкарала совета депутаташ хоржаш, иштта кердабоахаргба ГӏалгӀайчен Халкъа Гуллама депутаташ.
Хоржамашка кхадж тасса воагӀаргва дӏаязваь вола 258 645 саг. Шоай моттигашка болх нийса дӏахьош хургья 9 доазон тӏара 142 даькъ тӀара хоржамий кхелаш.
