Гӏалгӏайчера 200 зӏамига саг эскаре амал де гӏоргва
Гӏалгӏайчера 200 зӏамига саг гӏоргва эскаре амал де тайп-тайпарча российски тӏема доакъошка, яхаш, дийцар «Сердало» газетага Гӏалгӏай Республикан зарбан болх лелабераша.
Массехк ди даьлча, ерригача Россе санна, Гӏалгӏайче дӏайолаергья герзашцарча низий мугӏарашка тӏахьехаш йола бӏаьстан кампани. Из дӏахьоргья, бекарга бетта 1-ча денгара кӏимарса бетта 15-ча денга кхаччалца.
«Эскаре вахар лоархӏаме да хӏара къонача сага хьалха санна. Из ӏомалу бехктокхаме хила, бокъонца вола къонах хила. Гӏалгӏай даим хиннаб тӏема гӏулакх лоархӏаш, уж ӏадаташ тахан а дӏахо дӏахьош да, цу даькъе лаьрххӏача операцена юкъерча вай кагийча наха а. Белгалду, Россе Президента могадаь хиларах, карарча шера денз, бӏарчча шера кагийнах тӏахьехаш хургба эскаре. Цо таро лу болх дика вӏашагӏболла, говзанчашта дукха тӏалатташ бола болх аттача баккха», - аьлар мехка кулгалхочо Келаматанаькъан Махьмуд-ӏаьлас.
Цо иштта аьлар, республикан эскаре тӏахьехаш бола кагий нах шоай декхар дика кхоачашде кийча хиларах.
