Эскаре амал де гӀоргва вай мехкара 200 совгӀа зӀамсаг
БӀаьстанара эскаре кагий нах тӀабеха болх дӀаболабергба мехка, хьатӀабоагӀача бетта 1-ча дийнахьа денз. 200 совгӀа зӀамсаг ва укх шера вай мехкара эскаре амал де водар.
«Шера амал деш, тӀема гӀулакхаш Ӏомадергда вай кагирхоша; цул совгӀа, хӀара къонахчун дегӀаца хила еза оамалаш чӀоагӀъергья цар цига.
Белгалде деза, цига Ӏомаду бехктокхаме хилар, шийна тӀадехка декхараш дизза кхоачашдар, сий лорадар вахаре царна эггара чӀоагӀагӀа эшаш долга», - аьлар Мехкадас Келаматанаькъан Махьмуд-Ӏаьлас.
Ший бувзама оагӀонашка мехка Кулгалхочо белгалдир, тӀема гӀулакх Ӏомадар гӀалгӀашта юкъе массахана лоархӀаме хиннилга, хӀара къонах цунца дувзаденнараш довзаш хила везилга. Къаьстта тахан, вай къаман къонгаш тӀема операцена юкъе Даьхе лораеш латтача хана, геттара чӀоагӀа лоархӀаме да из.
«Тахан уж нах, кхоана шоай когаметта дӀаотта безаш, эскаре амал де болхарашта масал да. Даьхе лорае арабовла кийча хила беза уж массахана», - тӀатехар Мехкадас. Россе Президента хьакхайкадеш да эскаре амал де тӀабехара гӀулакх.
