Халкъашта юкъерча Гуржий мехкарча яхье дакъа лоацаш хилар Илдарха-Гӏалий тӏара спортсменаш
Гуржий мехка дӏахьош хиннача йоккхача яхье белгалбала аьттув хилар вай спортсмений. Из хоам «Сердалога» бир Илдарха-Гӏалий тӏарча мэре.
«Дунен, Европан чемпионате котало яьккха хиннача Алибегашви Тариэла хетаяь яр уж яхьаш. Акайнаькъан Элберд лакхерча лагӏа тӏа ваьлар (2016 ш. - 26 кг). Колой Хьамзата «дотув» дера республиканна (2014 ш. - 32 кг), хӏаьта Гарданаькъан Абубакр (2015 ш. - 38 кг), Колой ӏийса (2013 ш. - 53 кг), Йовлой Ибрахӏим (2012 ш. - 52 кг) кхоалагӏча моттиге хилар»,- йоах тхога кхаьчача хоамо.
Белгалдечох, эггара зӏамагӏа вола спортсмен массарел кадайгӏа хилар цу дийнахьа. Хьалхара моттиг йоагӏаш кхаьчалга гуш дар Элберда.
«Котало яккхарца даькъалабувц тахан спортсменаш, иштта цар тренераш Осканаькъан ӏамархан, Борзенаькъан Ахьмад. Дӏахо а, иштта толамаш доахаш, дӏабаха аьттув хилба цар массане», - аьлар администраце.
