Бахархошкара хаттараш дукхагӏа долга белгалдир мехкарча ЦУРе
Дӏадахача кӏира мехкарча бахархошкара тӏалатта хаттараш дикка дукхагӏа хиннилга белгалдир республикан доал деча моттиге (ЦУР). 149 хаттар дар мехкахошкара цу моттиге кхаьчараш. Хьалхагӏа хиннача кӏиран боарам теркалбича, дӏадахача кӏира 43% -га кхоачаш лакхагӏа латт из гӏулакх. «Сердалога» из хоам бера мехкарча ЦУРа болхлошкара.
Белгалде деза, эггара дукхагӏа хаттараш ЖКХ дувзаденна долга – 96, юкъарча боарама 64%. Шоллагӏча моттиге латт наькъашца дувзаденнараш – 18 хоам (12%), хӏаьта кхоалагӏча моттиге токаца дувзаденна хаттараш отт – 17 (11%).
Эггара дукхагӏа ЦУРе телефон еттараш Наьсарера бахархой ба – 50 (34%), Шолжа шахьар – 39 (26%), Магас – 18 (12%). Бахархошкара хӏара хоам ше-ший оагӏонцарча министерствашка дӏакхачийтаб, боаггӏача боараме тохкама болх дӏахьоргболаш.
