«Цхьана коталонга кхоачаргда» яхача СВО ветераний кхетаче, дакъа лоацаш ба вай мехкара викалаш
Москве укх деношка дӏахьош йолча «Цхьана коталонга кхоачаргда» яхача СВО ветераний Ерригача Россе кхетаче дакъа лоацаш ба вай мехкара викалаш. Тӏема доакъашхой вахаре дӏанийсбара, балха оттабара, дегӏа могашал меттайоалаяра оагӏонашца дувзаденнарех дувцаш бар мехкара ши эзар совгӏа доакъашхой. Вай республикера цига бахаб «Даьхен лорабой» яхача ганза мехкарча филиала кулгалхочун гӏонча Барханой Лиля, иштта тӏема операце ветеранаш Хазанаькъан Ибрахӏим, Оздой Бек-хан. Мехка болх дӏахьош эшаргдола кердадараш довзаргда вай мехкахошта лоархӏамеча кхетаче. «Сердалога» из хоам бера мехкарча Паччахьалкхера.
Лоархӏамеча хьаьшашта, спикерашта юкъе, цу доазон тӏа гулбенна ба тӏема операце доакъашхой, цар дезалаш, Россе Президента Администрацера викалаш, Федеральни Гуллама, паччахьалкхен болхлой, федеральни моттигий кулгалхой, тӏема корреспонденташ, бизнесменаш, иштта кхыбараш а.
Боккхача мехка тайп-тайпарча моттигашкара гулбеннача тӏема операце доакъашхой аьттув бар пайданедараш дӏа-хьа эца, керттердарашка гӏолла тохкам бе, СВО доакъашхой, цар цӏагӏарча наьха оагӏув хьаллацара тӏехьа малагӏа гӏулакхаш юкъедаха деза белгалде.
Эггара керттера моттиг дӏалоацаш дар, тӏема аренашкара цӏабаьхкача бӏухошта маьршача вахаре цхьа моттиг хьалаьца дӏабаха гӏо дар. Цу юкъе да тӏема ветеранаш балха увттабар, цхьацца говзал караерзае новкъастал дар, ветеранашта юкъе спорта хӏама доаржадар, ветераний юкъара моттигаш хьаллацар.
Кхетачен программо чулаьцараш дукха да. Республикашкара гулбенна викалаш дакъа лоацаш ба, кулгал деш саг волаш, дуккхачар кхетаченашка, паччахьалкхен моттигий кулгалхошцарча, бизнесменашцарча къамаьла юкъе, дешара оагӏон, иштта цхьаццадараш хьалхадоахаш болх дӏахьоча моттигашка.
