№ 412 йолча хоржамий моттиге кхадж тоссаш хилар «Сердало» яхача кепайоазон Цӏен кулгалхо
Россе Паччахьалкхен Думан, республикан Халкъа Гуллама хоржамашка дакъа лоацаш, дего хержарашта кхадж тоссаш хилар «Сердало» яхача Кепайоазон Цӏен кулгалду Курскенаькъан Хадижат. Магӏалбикерча №2 йолча ишкола коарча хоржамий моттиге яха хилар из, ший декхар кхоачашде. Кхадж тесса яьлча из боккха болх дӏахьош барашта баркал аьлар цо, хьаухача наха боаггӏача боараме терко ярах, деррига а тӏехдика кийчо яь хиларах.
«Россе, вай Гӏалгӏайчен кхоанарча вахаре лоархӏаме гӏулакх да тахан дӏахьошдар. Экономикан, вахара оагӏонцарча гӏулакхий, культуран, дешара оагӏон хӏама дикача оагӏорахьа тоадергдола бокъонаш хьакхоллаш хургбола нах ба тахан вай хоржараш. Из боаггӏача боараме кхетадеш, хьаллоацаш, хоржамий моттиге хьавена кхадж тасса беза из декхар тӏалаттача хӏара мехкахочо. Вай кхоаненца лоархӏаме да из!» - аьлар Курскенаькъан Хадижата.
Республикера журналисташ, низ дӏа ма кхоачча, болх дӏахьош ба цу оагӏонца. Кулгалхоша, журналисташа, массанена масал гойташ, эггара хьалхарчарца дакъа лоац хоржамашка. Берригача дезалца хьабоагӏаш, шоай декхар дизза кхоачашдеш ба уж. «Сердало» яхача кепайоазон Цӏено бахархой тӏахьех, цу гӏулакха юстара ца хулаш, дакъа лоацаш хилара. Вай вахарера лоархӏаме дола гӏулакхаш тоаде деза нах ба тахан хьахаржа безараш, цунга хьежжа хӏаране дӏатӏаэца деза кхадж тассар доккха декхар долга!
