Кӏимарса бетта «бассейна» ха кхача ши кӏира дисад, Магасерча «21 Ишколе» дехараш чуийдеш ба
«САФМАР» оагӏон президент, бизнесмен, меценат волча Гуцаранаькъан Микаила хьалхаэтта хьаеллийтача «Таьрахьашца дувзаденнарех йолча Академе» Сберагарча таьрахьашцарча технологе ишколе – Магасерча «21 Ишколе» кӏимарса бетта «бассейна» болх дӏаболабала йисар 14 ди совгӏа ха я. «21 Ишкола» сайте, кӏимарса бетта 1-гӏа ди хьакхачале, чудала деза дехар. «21 Ишколе» «бассейна» болх болабалар кӏимарса бетта 6-ча дийнахьа хургда.
«Бассейн - хьалхара саг ше тӏолаш бу болх ба «21 Ишколе» хургбараш хоржаш. Шин кӏира латтаргба из болх. Цу юкъа доакъашхоша кхетадергда малагӏа декхараш, программированеца двзаденнараш шоашта мел гарга да. 18 шерал тӏехваьнна моллагӏа саг ва цига дакъа лаца йиш йолаш. Программированеца дувзаденнараш довзар тахан керттерча гӏулакхех лоархӏаш дац «бассейне» дакъа лоацаш. Дукхагӏа болча доакъашхошта «бассейн» ИТ оагӏонца дувзаденнараш довзаш йола юхьиг я.
Шин кӏира С программироване мотт бовзаргба царна, иштта Lӏnux, «командни мугӏ» яхача оагӏонца дувзаденнараш, тоабанца декхараш кхоачашдергда, экзаменаш дӏалургья. «Бассейне» доакъашхой ӏомабу гӏалаташ тоаде, моллагӏа хӏама дашха, нийсагӏа бола никъ харжа, тоабанца болх дӏахьо. «Бассейне» хьаухараш тайп-тайпара говзал йола нах ба. Цхьаккха кийчо йоацаш, ИТ чувала йиш йий хьожаш хургба дуккхабараш. Хӏаьта ахкан хана салоӏаш болча студенташта геттара пайдане гӏулакх да из. Технологически оагӏонцара гӏулакхаш довзаш барашта дӏахо дикка гаьнабала аьттув ба ала йиш я цох.
«Дехар чудала йиш йола ха йодаш латт, цудухьа дакъа лаца безам бараша сухалбе беза. Магасерча «21 Ишколе» деша ловраша тахан къоастаде деза шоай хӏама. Хьалхара гӏа баккхар тӏехьатетташ йолча оамало новкъарле еш хул цхьабарашта, дукхагӏа йолча хана. Дешар, болх, проекташ – из деррига хӏама кхоаненга теттийташ да. Бакъда кӏимарса бетта дӏаболалуча балхо аьттув лу кампусе хьабаьхка дешарца дувзаденнараш ма дарра довза, ишкола чухьнахьара болх мишта дӏабодаш ба бӏаргаго, уж гӏулакхаш ший оамалашта, кхетама гарга дий ха. Тхо хьежаш да-кх цу тайпара говзал ярашка! Керттердар – кӏимарса бетта 1-гӏа ди кхачалехь, дехар чудала дезилга диццадар», - дийцар Магасерча «21 Ишкола» кампуса кулгалдеча Колой Руслана. Толамца хьалхарча оагӏонца чакхбаьннарий аьттув хургба ИТ-оагӏонца дувзаденнараш мах боацаш довза, шоаш хьахержача оагӏонцара болх дикка шаьрбе.
Дешара керттера программа итт оагӏонах латташ я, цу юкъе ба программни болх, «кибербезопасность», проекташта доал дар, бизнес-аналитик, интерфейсий дизайн. Магасерча кампусе дешаш болча арахьара хьатӏабаьхкарий аьттув ба тахан боаггӏача боараме деррига тоадаь латтача Смарт-отела кампус-студешка баха. Лоалаха ядача регионашкара, вай мехкарча гаьнарча кхаленашкара хьаухарашта чӏоагӏа дика гӏулакх хул цох. Из болх йоалацарча бокъонга хьежжа дӏахьош ба, цудухьа НДФЛ доагӏар доакъашхоша шоаш дӏалуш да. Деша безам барий тоабан юкъе хила ловчо «21 Ишкола» сайте дехар дита деза, кхетама хьал довзийташ долча онлайн-ловзарах чакхвала веза, ишколах йолча видеога хьажа веза. Цул тӏехьагӏа, шин кӏирах латтача «бассейне» ше хьавехарга хьежа веза цун, каьхаташ дӏадахьийта, кӏимарса бетта 6-гӏа ди оттале «бассейн» йолалуш Магасе хьава веза.
