«Дезал» яхача къаман проектага гӀолла, тоадергда Наьсарера культуран цӀа
Шахьарера культуран цӀа тоадеш, боккха болх дӀабахьа лерхӀ Наьсаре. «Дезале лоархӀамедараш, культураца дувзаденнараш» яхача проекта чуйоагӀача «Дезал» яхача къаман проектага гӀолла, чакхбаккха лерхӀ из лоархӀаме болх. Наьсарера культуран цӀа массахана дукха адам тӀалатташ, лоархӀаме кхетачена дӀакхухьаш йола моттиг я.
1975-ча шера хьалъяь из гӀишло дикка тоае езача хьале кхаьча дукха ха я. ХӀанзчул итт шу хьалха, 2013-ча шера гӀишло тоаеш дӀабихьача балха юкъедаханзар эггара лоархӀамедараш - канализаци, хин гӀулакх. Таханарча проектага гӀолла дӀабахьа лаьрхӀар боккха болх ба. Цунна юкъегӀоргда сантехника хувцар, тӀера куц эргадаккхар, хьачувоагӀа моттигаш, лагӀаш тоадар, коа лампаш йогӀар.
Иштта цхьайолча моттигашкара тхов хувцаргба, йоккхий кхетаченаш дӀакхухьаш йола зал, хьажархой зал, уйче тоаергья. Таханарча хано дӀадеххача тайпара, тоадаь Ӏооттаде лерхӀ культуран цӀа. МоллагӀа йола кхетаченаш дӀакхахьа паргӀата йолаш, цхьаккха кхоачамбоацараш юкъе доацаш, хила еза шахьарера из лоархӀаме моттиг. Цу проекто хьагойт; Россе Президента, Паччахьалкхено гӀо деш; вай мехкарча культуран оагӀонца дувзаденнараш доккхий хувцамаш юкъедоаладеш, тоадеш латтилга.
