Шин вешийна суд ергья, шоай юртхо верах
Гӏалгӏай Республикан прокуратуро чӏоагӏдир уголовни бехк беш дола шин вешийна духьалара гӏулакх, цар юкъарло духьала йолча унзарча тайпара саг вийна хиларах, яхаш, дийцар «Сердало» газетага мехка тӏахьожамхоша.
«Тохкамхоша яхачох, 2025 шера бекарга бетта 14-ча дийнахьа, Эккажкъонгий-Юрта, берий беша гӏишлон хьалхашка, юкъарлонца шоай лерхӏам цахилар къаьгга хьагойташ, шоаш нахах дош ца хеташ хилар, уж цалархӏар белгалдеш, юкъарлон цхьоагӏо йохаеш, ший фусам-нанна хьалхашка, иштта кхыбола нах а цига болаш; бийнаш а мӏаргаш а дийтта, цул тӏехьагӏа шоашка хинна герз пхезза техар 35 шу даьннача шоай юртхочоа. Цу човнех, дарбанче дӏакхачале, из саг велар», - аьлар ГӏР прокуратуран хоамо.
Бехке беш барех цхьанне, цу сага «Мерседес-Бенц» яхача машина чу вагӏаш зӏамига кӏаьнк а волаш, машина тховна а герз дийттар. Цу тайпара машина а зе дир 48 эзар сома. Цу юкъе бехкебераш дика кхетадеш бар, шоаш дер берий беша юхе хиннача кхыча наха а зулам дала йиш йолаш долга.
Хьалхагӏа а уж шаккха лаьца хиннав. Уголовни гӏулакх дӏадахьийтад прокурора ГӏР Лакхехьарча судага гӏолла тахкара.
