Керда ши машин еннай, ЖӀайрахьарча кхален дарбанченна
02.07.2025 09:20
Лоаман наькъашта лаьрхӀа йола машинаш кхаьчар ЖӀайрахьа кхалерча дарбанчен доалахьа, унахцӀенон оагӀонцара моттиг хьаллацарах йолча паччахьалкхен программага гӀолла.
«Сердалога» унахцӀенон министерстве белгалдечох, геттара кӀоарга, дӀакхача хала долча моттигашка ядача юрташкара унахой болча тӀакхача дуккха аттагӀа хургда лорашта; цул совгӀа, наькъа йоаеш йола ха а кӀезигагӀа хургья, хӀаьта из чӀоагӀа лоархӀаме да. Гемодиализа ухаш болча унахой хьал а дикка аттачахьа даргда хӀанз.
«Къаьстта лоаман юрташка бахача наха доккха совгӀат да дарбанченна керда машинаш ялар. Миччахьа бахача наха, гӀо ийшача хана сихагӀа тӀакхача аьттув лу цу гӀулакхо», - белгалдир унахцӀенон гӀулакхех йолча министерствон кулгалхочо Ӏалбаканаькъан Зарас.
