Единорос новкъостала вера, Пхьилекъонгий-Юртарча ха яхача фермерашта
«Дика гӏулакхаш» яхача болама чудоагӏаш, Гӏалгӏайчен халкъа Гуллама депутат, «Цаӏ йолча Россе» хьалххе кхадж тассара парте доакъашхочо Хамхой Батыра новкъостал дир, Пхьилекъонгий-Юрта йистте бахача ха яхача Висмурадовгӏар дезала.
«Висмурадовгӏар дезал, шоаш ха яха къоаной хиларга хьежжа доацаш, шоай хьамсарча лаьтта фермерски боахам лелабш хьабоагӏа дукха ха я. Ара догӏаш латтарах, кӏаьдвенна хиларах Висмурадовгӏар Саӏида хала дар ший ханнахьа жа ларга. Уж шоаш цхьаь бах, уж халонаш ловш. Царна новкъостал эшаш хилар шийна хайча, Хамхой Батыр цига вахар ший гӏончаца, цар новкъостал дир царна из хала болх тӏерабоаккхаш», - аьлар «Сердало» газетага «Цаӏ йола Росси» яхача парте.
Тхоца къамаьл деш, депутата аьлар, цу тайпара къахьегаш болча наха новкъостал де деза. Из лоархӏаме да, хӏана аьлча тахан шоаш ха яха нах хиларах царна хала да доккхий балхаш леладе. Цудухьа цар йоакхо е езараш вай да.
Иштта терко ярах цецбаьнна, депутата баркал оалаш бар Висмурадовгӏар. Цар белгалдир, наьха дикал боарам боацаш хилар.
