Магасерча моттигашка пандусаш хилар теркалдир единороссаша
Магасерча моттигашка, дегӀа могашал эшаеннача наха лаьрхӀа пандусаш йоахкий хьожаш хилар, «ЦаӀ йола Росси» яхача парте доакъашхой. Малсаганаькъан Д. цӀерах болча урам тӀара моттигаш яр укх наькъа цар теркаме лаьцараш. Из хоам «Сердалога» бир парте зарбан болх лелабераша. Пандусаш йоахкий хьажарал совгӀа, уж боаггӀача боараме, деррига теркалдеш хьаяьйий хьежар единороссаш.
«Доккхий дола кхоачамбоацараш хоадаланзар тхона из болх дӀахьош. ДегӀа могашал эшаеннача наьха хьал теркаме лаьца, царна атто хилийтара тӀехьа дӀахьош ба из болх.
Дарбанче, аптеке баха арабаьннача цу мугӀарерча наха; хало хургьяраш юстардаха деза вай. Могаш боацача наьха паргӀата дӀа-хьа баха, атта баха йиш хургйолаш къахьега деза вай, цар дегӀа хьал теркалдеш», - дийцар Дарсиганаькъан Хаваж-Бахьаудина.
