Гӏалгӏайчен единороссаша шоай хоржамий программа чӏоагӏйир
«Цаӏ йолча Россе» Гӏалгӏай оагӏон 37-ча конференце кхоалагӏа дакъа дӏахьош, лаьрххӏа тӏаийцар парте хоржамий программа. Цу каьхато хьагойт Vӏӏӏ-ча кхайкарала республикан Халкъа Гуллама хоржамий керттера декхараш. Программан проект гойтар моттигерча даькъа кулгалхочо Илезанаькъан Микаила. Ше къамаьл деш, цо белгалдир, тӏеххьарча цун йоазон тӏа «Цаӏ йолча Россе» Халкъа программа кердаяьккха хилар, иштта моттигерча бахархоша тӏадехкаш дола декхараш, царна бакъахьа хетараш.
«Кердача программан керттерча декхарех цаӏ да СВО бӏухой, цар дезал хьаллацар. Парти лаьрхӏа я республикан закона боарам тӏа уж хьаллаца, цу юкъе да ахчаш дӏадалар, йоала таронаш царна лоаттаяр, газ чуйиллар, лорашка меттаоттабара дарба дар, протезаш яр, санаторешка дарба дар. Программа керттерча декхарашта юкъе да - керда республикански дукха оагӏонаш чулоацаш йола дарбанче хьалъяр, Эса хий чулацар, иштта берашта лаьрхӏа меттаоттадара центр хьалъяр. Дӏахо цу тӏа да дешар, экономика, юртбоахам, кагирхой политика, экологе проекташ дегӏайоалаяр», - аьлар «Сердало» газетага «Цаӏ йолча Россе» парте ИРО зарбан болх лелабераша.
Гӏалгӏай единороссий керттерча декхарашта юкъе да керда балха моттигаш хьаеллар, зӏамига, юкъера бизнес лелаерашта новкъостал дар. Иштта программа чудоагӏаш да укх заман промышленни оагӏонаш дегӏайоалаяр, лакха технологи йола мугӏараш, иштта пилот чувоаца аппараташ яра хьал тоадар. Терко тӏаяхийтар юртбоахама фермераш хьаллацара, кхашка хий тохара йола балха оагӏув меттаоттаяра.
