Берий беш тоаеш дӏабихьача балхага хьежар, Шолжа кхалера единороссаш
Гӏажарий-Юртара «Селаӏад» яха берий беш - ясли тоаеш, боккха болх дӏабихьаб мехка. Кердача куца тӏа йоалаеш эргаяьккхача берий бешо, хьаьший тӏаэцаш, ший наӏараш хьайийллай тахан. Къаман программага гӏолла дӏабихьа болх боаггӏача боараме чакхбаьккхабий хьажа арабаьлар «Цаӏ йолча Россе» доакъашхой.
«Цу кхетаче дакъа лоацаш бар Шолжа кхалерча оагӏон секретарь Йовлой Мухьмад, «Цаӏ йолча Россе» депутаташ. Берий беша хьал меттадоаладеш, тӏера тхов хийцаб, канализаце, йӏовхала гӏирсаш, тока саьргаш хийцад, чура пенаш дикка шаьрдеш, йӏайхагӏа хургйолаш болх дӏабихьаб. Иштта бераш ловзаш, ӏодувшаш йолча, даа хӏама кийчдеча, кулг-юхь дулача, болхлошта лаьрхӏача моттигашка кулг техад доккхий хувцамаш деш. Кораш, наӏараш хийцад. Берий беша кулгалду Тӏумхой Мария яр партийни десантаца къамаьл даьр. Дӏадихьача хувцамех, бераш хьачудаьхкачул тӏехьагӏа дӏаболабаьча балхах дийцар цо», - йоах «Сердалога» «Цаӏ йола Росси» яхача парте моттигера бенача хоамо.
Единороссашта хьалха латтача Йовлой Мухьмада белгалдир, болх боаггӏача боараме, цхьаккха кхоачамбоацар доацаш, дӏабихьа хила безилга. Цо теркалдечох, берий бешара кабинеташ хӏанз дикка шерагӏа, кхераме йоацаш я, берашта, иштта болх беш барашта паргӏатагӏа хургья. Шолжа кхален моттигашка Къаман программага гӏолла дӏахьоча кхыдолча балхашта а лакха терко, тӏахьожам лоаттабе лаьрхӏа ба уж.
