«Сердало» газета балха лакха мах оттабир Поленов Д.В. цӏерах йолча ГРДНТ ӏилманхоша
Вай мехка кхаьчача Поленов Д.В. цӏерах долча Россе Паччахьалкхен кхоллама Цӏен фольклорно-этнографически балхах йолча тоабанца кхетаче дӏахьош хилар шоатта дийнахьа культуран гӏулакхех йолча министерстве. Йоккха, лоархӏаме тохкама проектага гӏолла вай республикерча моттигай, гӏулакхий истори тохкаш болча нахах яздеш хилар «Сердало» цар болх ма барра боаржабеш. Россе культуран гӏулакхех йолча министерство хьаллоацаш дӏахьош болх ба из.
Кхетаче дакъа лоацаш бар культуран гӏулакхех йолча министерствон кулгалхочун гӏонча йола Куртойнаькъан Макк, цу тоабан хьалха ваьнна вай мехка кхаьча цӏихеза российски ӏилманхо, Уральски РАН оагӏон гуманитарни тохкамах йолча института кулгалхо, профессор, исторически ӏилман доктор Черных Александр, цунца цхьана болх беш бола ӏилманхой, республикерча къаман кхоллама Цӏен кулгалду Зурабанаькъан Ахьмад, къаман культураца дувзаденнараш лорадара тӏехьа къахьегаш бола Йовлой Ильяс, Султиганаькъан Рамзан.
«Сердало» газетас хоамий оагӏонца дикка гӏо деш хилар белгалдир спикераша. Гаьнара кхаьчача хьаьшаша хӏара дийнахьа вай мехка дӏахьош хиннача балхах дийцар газетас мехкахошка. Тоабан кулгалдеча Черных Александро доккха баркал аьлар газета болхлошта. Цо белгалдир, тоабан доакъашхой хӏара денна хоамий оагӏон тӏа дӏатӏабоалаш хиннилга, цар дӏахьоча балхах бола хоам эггара хьалха латтарашта юкъе хиннилга. Культуран гӏулакхех йолча министерствон кулгалхочун гӏонча йолча Куртойнаькъан Маккас а белгалдир «Сердало» газето дикка оагӏув хьаллоацилга.
Йовлой Ильяса теркалдир, газета болхлой къаман культураца, ӏадаташца, истореца дувзаденнараш доаржадара, лорадара тӏехьа дикка къахьегаш хьабоагӏилга.
Дӏахо кхы а шерагӏа доаржадеш дувца лерхӏ газета корреспонденташа Поленов Д.В. цӏерах йолча ГРДНТ проектах, цар вай мехка кхоачашде аьттув баьннарех.
