Магасе дӏахьоргья « Со - инженер» яхача проектех йола фестиваль
«Со - инженер» яхача инженерни проектех йола фестиваль дӏахьоргья Магасе. Укх бетта 12-гӏа ди дехар чудалара тӏеххьара ди да. Дакъа лоацаргдараш ба 8 шергара 18 шерга кхаччалца бола дешархой.
«Сердалога» из хоам бир «Кванториум» яхача берий технопарко. «Инженерни оагӏонцара шоай говзал йовзийта, шоай болх боаржабе аьттув хургба берий. Саькура бетта 16-ча дийнахьа таьрахьашца дувзаденнарех йолча Академе дӏахьоргья яхьаш. 8-10 шу даьннача дешархошта юкъе хургда «Россе инженерни кадраш» (ИКаР) яха къовсамаш. Юкъерча лиге 11-13 шу даьннараш хургба.
Хӏаьта 14-18 шу даьннараш «Инженерни проект», «Программировани», «Шолже» яхача Агрокомплексагара инженерни декхар» яхача оагӏонашца шоай говзал гойташ хургба», - дийцар тха газетага. Толашагӏа бола болх хоржача дакъа лаца йиш йолаш ва моллагӏа саг.
«Хьажархоша харжарах дола совгӏат» яхача оагӏонца дикагӏа бола болх къоастабе аьттув ба бахархой.
