Тӏемхой дезалашта терко лоаттаеш ба, «Даьхен лорабой» яхача ганзе
19.06.2026 09:54
«Даьхен лорабой» яхача ганза болхлоша, бӏухошта фу эш хьожаш, терко лоаттаю, ветераний дезалашта. Массахана царца бувзаме болаш, цар хьашташ кхоачашде хьожаш, къахьег ганзе.
«Тӏема аренашка вахар хаьдача Кхоартой Ахьмада дезал болча ваха хилар ганза Магӏалбикерча филиала болхло Коазой Хьамид. Бӏухочун наьнаца Ӏайшетаца къамаьл дир цо, таханарча дийнахьа царна эшар фуд хайра. Дукха ха яц тӏемхочун нанна операци яь, хӏаьта хӏанз сихагӏа меттаоттаргйолаш дикка дарба эш цунна. Филиала болхлочо ший бахьа беза болх дӏабихьа, цӏагӏа хьаухаш лораш цунга хьежаргболаш вӏаштӏехьадаьккхар. Могашал дикка меттаотталца терко еш хургба цун», - дийцар тха газетага.
Дукха ха йоацаш хьаделар цар дезала ӏаьдалгара хьадоагӏача хӏамах дола удостоверени.
