Вай мехкарча СВО ветерана йоӏа, гӏо дир «Даьхен лорабой» яхача ганзо
Куштанаькъан Камилайгара дехар кхаьчар «Даьхен лорабой» яхача ганза болхлошка. Тутайнаькъан И.А. цӏерах йолча лорий йижарий колледже деша отта новкъостал де шийна, яхаш, дехар тӏема операце доакъашхочун Куштанаькъан Хьусена Йоакъапа йоӏа Камилас.
«2024-ча шера саькура бетта Московски областера Украине дӏавахар Йоакъап. 2024-ча шера тов бетта мийна эккхарах хиннача човнех дарба деш Наро-Фоминскерча дарбанче хилар из. «Денал хиларах» яха майдилг енна ва из цига кхаь йиӏий да. Бӏухочун йоӏагара каьхаташ хьаийца, колледжа кулгалхошца бувзаме яьнна къамаьл даь, СВО доакъашхочун йоӏ цига дӏаэцаргйолаш дийцад ганза болхлочо Буружанаькъан Хаде», - йоах «Сердалога» цигара бенача хоамо.
Йоккха юкъ ялалехь, вӏаштӏехьадаьккхар из гӏулакх. Ганза болхлоша гӏо даь, таханарча дийнахьа цу колледжа студентка я бӏухочун йоӏ. «Даьхен лорабой» яхача ганза моттигерча филиала болхлой шоашта могачох бӏухой, цар дезалий хьашташ кхоачашдеш ба.
