«Даьхен лорабой» ганз хьежар, Илдарха-Гӏалий тӏа СВО бӏухой меттаоттабара болх мишта дӏахьу
Гӏалгӏай моттигера «Даьхен лорабой» ганза филиала викал Темарханаькъан ӏийса хьежар, Илдарха-Гӏалий тӏа СВО бӏухой меттаоттабара хьал мишта латт. Ше къаьстта хьажар духьа бӏухошта, цар дезалашта лорий хьалаш мишта лоаттаду, из хилар моттигерча меттаоттабара поликлиника чуйоагӏача центре.
«Цу лаьрххӏача моттиге, карарча хана дарба деш ба СВО доакъашхой, иштта цар дезал. Уж ба Даьхен бӏухой ноаной Майсиганаькъан Радимхан, Йовлой Леймхан; тӏема ветеранаш Темарханаькъан Амиран, Гӏайтакханаькъан Илез; иштта СВО доакъашхой фусам-ноаной ӏоахарганаькъан Марет, Мархенаькъан Лейла. Цига ваха волаш, тха болхло хьежар палаташка, цун вӏашагӏкхетар хилар цига дарба деш болча нахаца, иштта хайра цига малагӏа лорий гӏулакхаш лоаттаду. Керттердар ветеранашта фу эш хар», - аьлар «Сердало» газетага «Даьхен лорабой» ганза филиале.
Цига ше волаш, ганза болхлочун таро хилар центра кулгалхошца, лорашца къамаьл де. Цар дийцар, ветеранашта деча дарбаех лаьца. Кхетаче чакхйоалаш, Темарханаькъан ӏийсас баркал аьлар цу моттига болхлошта, цар лакха балха говзал хиларах, уж СВО бӏухошка иштта дика хьажарах.
