Галашкарча №1 йолча ишколо ший бӏаь шу дизар белгалдир
Галашкарча №1 йолча ишколо дездир, ший 100 шу дизар. Цу цӏайна хетаяь программа кийчйир Шолжа кхален культуран Цӏен кхоллама тоабо.
«Ишкола цIай дездеча дакъа лоацаш бар Шолжа кхален администраце кулгалхо Татенаькъан ӏийса, Шолжа кхален депутатий Совета кулгалхочун гӏонча ӏалбаканаькъан Хаваш, иштта кхыбола беза хьаьший. Цига дакъа лоацаш хилар хьехархой, къахьегама ветеранаш. Уж ба №1 йолча ишколе дукхача шерашка болх баь нах, иштта цига бар Галашкара бахархой», - аьлар «Сердало» газетага из цӏай вӏашагӏделлараша.
Цунга дика кийчо яьяр Шолжа кхален культуран Цӏен тоабо, цар вӏашагӏкхетар хоздир ловцаша, кхоллама моттигаша. Концерта программанна чудоагӏаш дар РДК солиста Гарданаькъан Шамала, Барханой Заьлмахий, Балай Мухьмада иллеш. Царех хӏара безамца тӏаийцар наха.
Ишкола кулгалхочо Мусенаькъан Амината баркал аьлар гулбеннарашта, иштта из сийрда цӏай кийчдаьча Шолжа кхален культуран Цӏенна, шийна керте Матенаькъан ӏайшат йолча кхоллама тоабанна.