ГӀалгӀай къаман
юкъара газет

Новости


Гӏалгӏайчен Кулгалхочун балха чуйоагӏача къоаной Кхело гойтар «Боарам» яха проект

Гӏалгӏайчен Кулгалхочун балха чуйоагӏача къоаной Кхело гойтар «Боарам» яха проект

Гӏалгӏайче дӏайихьар дезалера мах бараш, хьоалчагӏан ӏадаташ лорадара йола кхетаче. Цига дакъа лоацаш яр Гӏалгӏайчен Кулгалхочун балха чуйоагӏа къоаной Кхел, дина даьй, республикан кагирхой Комитет, кагирхой юкъарло, иштта банкетий залий дай.

Керттера цун маӏан дар, «Боарам» яха проект гойташ хилар. Къоаноша юкъедаьккхар зехьа ахчаш доаду, къаман гӏулакхашца ца доагӏа хӏамаш дӏадахар.

Проекта чудоагӏаш дар ӏадатех дола гӏалгӏай чокхи, бер мархӏадоллар, тӏабувха гӏирс боарамах боагӏача беса хилар юха юкъедаккхар. Цунца цхьана белгалдир, замелха пхи машина мара яхийта йиш йоацилга, иштта маьре додача нускало дукха мах бехаш дола совгӏаташ дахьар, йоккхий торташ, зизаш, маьр-нанна гӏоз бахьар юкъера дӏадаккха дезилга.

Къамаьл деш къоаной Кхела доакъашхоша Бузуртанаькъан Хьамзата, Доврбиканаькъан Ӏийсас, Хазанаькъан Исмаӏала белгалдир, хӏара ӏадат лораде дезаш хилар; цу юкъера эггара лоадам боацар а дӏадаьккхача, къаман ӏадат доадеш хилар. Дин хьехамаш деча Омаранаькъан Мухьмада хьалхадаьккхар боккхагӏбараш лархӏар шоай цӏагӏарча дезалашта хьеха дезилга, цар хьоалчагӏаш дӏахьоча новкъостал деш хилар лоархӏаме долга.

Из хьаллаьцар Гӏалгӏайчен кагирхой гӏулакхех йолча Комитета кулгалхочо Пхьошанаькъан Зоврбика. Цо белгалдир, хьоалчагӏаш дӏахьоча юкъе кагирхой бахар эшаш долга, из вай культуран тӏехьале йолга. Сатувсилга да, «Боарамо» юкъеяьха моттигаш лораергья аьнна. Дукхача хана денз, гӏалгӏаша лорадеш хьадоагӏаш дола хоза ӏадаташ да уж, цар таро лу гаргара нах вӏашкаоза, юкъарлон барт бе, эггара халагӏча ханашка а уж лорадеш хьаденад вай къам.

Тахан вай къаман ӏадаташца доаца арахьара хӏамаш дукха юкъедаьха, товш доацача боараме дерзадаьд хьоалчагӏаш. Из чакхдалийта йиш йолаш дац, цо доаду гаргарча наха юкъера гӏулакх, вӏашагӏъийна ю культураш, ӏадаташ. ӏадаташ - из дӏаяха ха дагайоагӏаш хилар дац, из я кагирхошта кхетам луш йола кӏийле, цо хьакхолл дезалера барт, чӏоагӏо.

Гӏалгӏай мотт лорабеш, ӏадаташ диц ца деш вай хилча мара, тӏехьа тӏайоагӏача тӏехьенна вай дита йиш яц къаман хоза гӏулакх, из ерригача юкъарлон декхар да. Цу тайпарча наькъаца мара хургйолча ханашка майрра юхахьажа йиш йолаш хургдац къам а.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде
Вверх