Дзюба Галина: Магасе гуш дола кердадараш берригача мехка юкъекхувла деза
Магасерча моттигий хьал тахка арабаьлар «ХӀарма» яхача кхетачен РФ Юкъарча палатан доакъашхой. Цар теркаме лаьцар наькъашкара хьал, наха салаӀа къоастаяь моттигаш, иштта федеральни проекташка гӀолла дӀадихьа тайп-тайпара гӀишлон балхаш.
Комиссена юкъе хиннараш - Дзюба Галина, Буторин Сергей, Яковенко Ирина. ЧӀоагӀа тамашийна хеташ, хьийжар хьаьший шийлача хана йӀовхал телаш дола гӀандаш доахкаш, моллагӀа хатар хилча МЧС болхлой оарцагӀбехаш бола гӀирс оттабаь, дегӀа могашал эшаеннарашта дӀакӀалхабовла атта хургдолча тайпара тоаяь йолча Магасерча остановкашка. Дзюба Галинас аьлар, иштта дола кердадараш берригача мехка доаржаде деза аьнна: «Дукхача шахьарашка хиннай со, бакъда иштта тоаяь остановкаш цхьаккха моттиге яйнаяц сона! Берригача мехко масал эца дезаш хӀама да ер», - аьлар цо, кхыйолча моттигаш из гӀулакх доаржадара тӀахьехаш.
Иштта хьаьший хилар Эбарга-Юртарча, Шолжа-Шахьарерча скверашка гӀолла. Дика хургда аьнна хетача, юкъедоаладе дезача хувцамех дийцар цар, цига хиннача Шолжа-Шахьарерча администрацен кулгалхочунга Ӏумаранаькъан Асланага, Шолжа кхален администрацена хьалха латтача Татенаькъан Ӏийсайга. ГӀалгӀай мехка шийна бӀаргадайначох тамаш еш, доккхал деш яр Дзюба Галина. Юкъарча балха доакъашхоша Ӏаьдалца бувзам лелабеш хиларо вахарера кхоачамбоацараш ма дарра бӀаргадайтилга, белгалдир цо.
