Гӏалгӏайчен ГАСо, «Солво» компане бартчӏоагӏам бир архиваш таьрахьашка яхарах
Гӏалгӏайчен паччахьалкхен архива гӏулакхо, иштта «Солво» ЧПОУ цхьана бартчӏоагӏам бир архива болх таьрахьашка баккха. Цар бувзам лаьрхӏа ба дукхача шерашка лелабара, архива даькъ тӏара беррига болх кердабаккхара. Оагӏонаша лаьрхӏар цхьана хьалхале лелаю хоамий оагӏонаш юкъеяха, иштта ӏилман-практически тохкамаш дӏадахьа, дукхача шерашка пайда а луш, тамашийна архива каьхатий ганз лелаяра.
«Цхьана бе лаьрхӏача балха чудоагӏаш да ИТ балхаш мишта дӏадохьалу хьажар, уж кердадахар - из лаьрхӏа да каьхата болх аттача баккхара, электронни кепара хургболаш. Къаьстта йола терко тӏайохийтаргья сага хьаькъало кхеллача таронашта, цо гӏо дергда республикан архивни ганза болх аттагӏа лелабе. Из хьал юкъедоаккхаш да Гӏалгӏай Республикан Кулгалхочо тӏадиллача декхарах, паччахьалкхен политика юкъе а йоаккхаш, Даьхен ӏT даькъ тӏара хьал дегӏадоаладара, иштта паччахьалкхен ӏаьдала моттигаш российски программай ӏалашо йолаш хилийтара. 2023 шера, наджгоанцхой бетта 18-ча дийнахьа, № 21 йолаш Россе таьрахьий Министерствос чӏоагӏдаьча амарах, цу тайпара хаттараш юкъедоагӏаш хилча российски ПО юкъеяккха могаду, цох бола хоам чубоагӏаш ба Цаӏ йолча российски программа ӏалашонна», - аьлар «Сердало» газетага Гӏалгӏайчен Паччахьалкхен архива гӏулакха кулгалхочо Ховтанаькъан Руслана.
Цхьана болх беш хиларо иштта новкъостал дергда нахага архивни хоамаш дӏакхачийта, цул совгӏа из дика кӏийле я Гӏалгӏайче керда таьрахьий хьалаш юкъедаха.
