Вай гимназисташта хьалхадаьккхар; Даьхе езаш, цунна амал деш хила безилга
Мехка «ЦаӀ йолча Россе» кулгалхочо Кхоартой ИбрахӀима МагӀалбика №1 йолча Чахкенаькъан С. цӀерагӀча гимназе кхетаче дӀайихьар «ЛоархӀаме къамаьл» аьнна. Из хетаяь яр Даьхенна, из езаш хила безара долча къамаьла, яхаш, дийцар «Сердало» газетага «ЦаӀ йолча Россе» зарбан болх лелабераша.
Ше лакхерча классашка багӀача дешархошца къамаьл деш, цо довзийтар Даьхе езар яхача дешай маӀан, иштта дика гӀулакхаш, граждански оагӀув хьаллацар.
ГӏалгӀай республика дегӀайоалаяра кагирхоша шоашкара дакъа юкъедахьа дезарах, Даьхенцара безам совбаккхарах дийцар.
«Даьхен мутӀахьа хилар - уж духхьал дешаш хинна Ӏац, из вайх хӀаране деш дар да. Из да, шийна гонахьара дуне тоадар, уллуврча сага новкъостал дар; ший мохк, ший Даьхе езаш хилар. Тахан юкъарча вахаре оаш дакъа лоацаш хиларах тийша да вай вахар хьал тоадалар», - аьлар Кхоартой ИбрахӀима.
