Магӏалбика администраце кулгалхо, наьха дехараш тохкаш хилар, уж бахача моттиге дIаваха
Магӏалбик шахьара администраце кулгалхо Боканаькъан Мухьмад, балха инспекци еш, наьха хаттараш тохкаш хилар. Из вахар Базоркин И. цӏерагӏча №64 йолча цӏен бахархой болча. Хьалха, нах тӏаэцаш ди долча хана, цар кхайкарал дир шахьара кулгалхочунга, шоашта хьалхашка нийслуш дола коммунальни даькъ тӏара хаттараш кхоачашдар дехаш. Уж латкъаш бар шахьара кулгалхочунга лоалаха мах беш йола моттиг хилар бахьан долаш, даим сатем байна я, яхаш, иштта контейнераш лоаттаю моттиг воча хьале я, цул совгӏа, трансформатора подстанцена юхе дукха нувхаш гулъяьй, яхаш, дийцар цо.
«Гӏараш хилара хьал тахка новкъостал дергда Магӏалбика-Шахьара, Магӏалбик кхален Роспотребнадзора отдело. Цун кулгалхо Дзараханаькъан Адам вера нахаца кхетаче дӏахьоча. Говзанчаша тӏахьожама болх дӏахьу, цу гӏулакха йоагӏаш йола чаккхе ергья.
Контейнераш цигара дӏайоахаргья. Наха накъайоалаш а, цох кхы халонаш хургйоацаш а долча даькъ тӏа керда моттиг хержар. Трансформатора юхера нувхаш дӏаяха аьлар «Магӏалбик шахьара хьалаш лоаттадеча» МКУ. Цул совгӏа, Россете а кхайкарал дергда подстанцена юхера доазув лорадара хаттар кхоачашдергдолаш», - аьлар «Сердало» газетага Боканаькъан Мухьмада.
Шахьара администраце кулгалхочо бахархошта баркал аьлар, цар иштта шоай вахарера хаттараш кхоачашдар теркам тӏабохийташ леладарах. Цо белгалдир, къаьстта цу тайпара нах хиларо таро лу сиха юстардаха кхоачамбоацараш.
Цига бахача хана мел хинна наьха хаттараш балха юкъедоахаргда, уж кхоачашдергда цу гӏулакха бехктокхаме долча боахамаша. Администраце кулгалхочо, бахархоша цхьана барт бир, баь баьннача балха цхьана мах оттабергболаш, цу тайпара кхетаче цӏаькха а дӏаяхьа.
