Магӏалбика кхален администраце кулгалхочо, нах тӏаэцаш, болх дӏабихьар
Магӏалбика доал деча даькъ тӏара бахархой тӏаэцаш хилар администраце кулгалхо Къоастой ӏаддал-Хьамид. Цу тайпара къамаьл дӏахьош хиларо таро лу бахархой хьашташ довза, царна хьалхарча аргӏагӏа эшаш дар фуд ха.
«Из болх дӏахьош со волча вера Йоккхача Ачалкхен вахархо, цхьан урамах сердал тоаяр дехаш. Аз тӏадиллар цу даькъ тӏа къахьегаш болча болхлошта гӏулакх довза а из кхоачашде а. Иштта декхар оттадир доал дара даькъ тӏарча кулгалхочун, администраце къахьегама даькъа болхлошта хьалхашка, цу балхага дӏадодар мел рузкъа да тахка, из болх кхоачашбе мел ха езаргья хьажа.
Дола-Коарча бахархой дехар дувзаденнадар никъ тоабарца, иштта урам тӏара сердал, токацара хьал тоадар дехаш. Ара кӏеззига хаоттам тоабелча наькъа хаттар кхоачашдергда; цул совгӏа, тока хьал тоадара дош теркаме ийцар цу гӏулакха бехктокхаме йолча моттиго. Цу дийнахьа кхыдола хаттараш а дар наха тӏадена. Царна а жоп лургда, кхоачаш ца деш цхьаккха а дутаргдац», - аьлар Къоастой ӏаддал-Хьамида «Сердало» газетага.
Администраце кулгалхочо белгалдир, деррига хаттараш тӏахьожам болаш хургда, царех цу нахага хоам бергба.
