ГӏалгӀайчен кулгалхочо «Интерфакс» оалача ИА интервью елар
Петербурге дӀахьош хинна халкъашта юкъерча экономически кхетаче йолаш, ГӏалгӀайчен Кулгалхочо Келаматанаькъан Махьмуд-Ӏаьлас интервью елар «Интерфакс» яхача хоамий агенствонна, цо хоадам боллаш дийцар тахан ГӏалгӀайченна карагӀдоалачарех.
Мехкадас белгалдир, ГӏалгӀай мехко тӀехьарча хана дика толамаш даьха хилар тайп-тайпарча доакъошка, цу юкъе агропромышленни комплекс, туризм, промышленность, ӀТ-сектор йолаш.
«2025-ча шера тхо хьежаш да инвестицей хьал дегӀадарга, къаьстта юртбоахаме, дохкара-эцара даькъе.
Масала, «Шолже» яха теплицаш лелаю, «Южный» яха коа тӀара оалхазараш кхеду моттигаш толамаш гойташ я», - аьлар Мехкадас.
Цул совгӀа, юкъедоалаш латт бизнес хьаллацара дола хьалаш, промышленность дегӀакхувлара Ганзага гӀолла цхьацца оаттонца дувзаденна декхара ахча далар, йоал яккхара йола ха тӀехьаяккхар бизнес дӀайолаярца, инфраструктура Ӏалашъяра субсидеш даларца.
Мехка Кулгалхочо белгалдир, иштта лоархӀаме хилар импорта даькъ тӀа дӀа-юха хувцамаш дара проекташ. Карарча хана дика кхоачашъеш я 17 проект, юкъара мах 17 млрд сом совгӀа болаш.
Теркам боацаш дисанзар, ГӀалгӀайчен туристически хьал дегӀаухаш хилар а. Тахан туристаш ахар сиха дегӀадоагӀаш латт – духхьал тӀехьарча цхьан шера из гӀулакх дегӀаденад 16,5%.
