Тӏема сийлен Дийнахьа, мехкахоша гойтача турпалча гӏулакхех дийцар вай Мехкадас

«Тӏема сийлен Ди лоархӏаме, доккха да вай къаманна! Даьхен гӏулакхе лаьттача яхь йолча къонгий истореца дувзаденна да из деррига. 1768-1774-ча шерашка хиннача эрсий-туркий тӏема юкъе Россегара духьале еш хиннаб вай бӏухой. Тӏема исторена довзаш да из деррига. Дӏахойодача хана а Россе хӏама хьаллоацаш, цӏихеза болаш, деналца, майралца шоаш дӏабовзийташ, лаьттаб вай къаман къонгаш. Российски императорски эскара юкъе, инарала цӏерага кхоачаш къахьийгад вай къаман пхе сага. Царех ва Базорканаькъан Бунхо, Малсаганаькъан Сафарбик, Бекбузаранаькъан Сосланбек, Укуранаькъан Тонт, Налганаькъан Элберд. Дунен хьалхара тӏом латтача шерашка, гӏалгӏай 30 эпсарех Георгиевски кавалераш хилар, Дошо Георгиевски герз денна белгалваь хиннав кхы а ийс саг. Российски импере эггара лоархӏаме, доккхагӏа хинна совгӏат да из. Сийлахь-боккхача Даьймехка тӏема шерашка а цӏихеза хиннаб гӏалгӏай къонгаш. РФ Турпалаш беш белгалбаьхар дукха шераш даьнначул тӏехьагӏа Оздой Мурад, Малсаганаькъан Ахьмад, Къоастой Ширвани», - язду вай Мехкадас ший телеграм-оагӏон тӏа.

Республикан Кулгалхочо аьлар, таханара къаман къонгаш из никъ сийленца дӏахохьош болга. Украинерча тӏема операцена юкъе белгалбаларах, Россе Турпал яха цӏи елар вай пхе мехкахочоа, царех виъ сага из цӏи кхелхачул тӏехьагӏа елар. Таханарча исторе лоархӏаме моттиг дӏалоацаш ба Советски Союза Турпал Овшанаькъан Руслан, РФ Турпал Евкуранаькъан Ювназ-Бек, Россе хьалхара Турпал Осканаькъан Сулумбик.

Россе лакхара совгӏат денна – РФ Турпалаш   ба вай мехкара 17 саг. Паччахьалкхен кхерамзлен оагӏонца дувзаденнараш лорадара наькъ тӏа инарала цӏерага кхаьчаб къаман дукха къонгаш. Тӏемхошта, ветеранашта, цар даьшта, ноаношта баркал кхайкадеш, къамаьл дир вай Мехкадас. Иразе, беркатаца, бартаца баха даькъалабийцар уж мехка кулгалхочо! Мехкадас теркалдир, къона тӏехье хьалха дӏабахарий турпала никъ бовзаш, цун сийдеш хила езилга!