«Машук» Оагӏон тоаба даькъалайийцар вай Мехкадас
«Машук» дешара моттига тоабанга, болх дӏаболабаь диъ шу дизарца даькъалаювцаш, къамаьл дир вай мехкадас Келаматанаькъан Махьмуд-ӏаьлас. Дукха ха яьннаеце а, хьехархой балхаца, Россе хьехамчий гӏулакхаца пайданедараш доаржадеш, кердача наькъ тӏа майрра гӏа баккха гӏо деш, къахьегаш ба цу оагӏонца. Дуккхача наха юкъера бувзам чӏоагӏбеш, балха тӏа накъадаргдола кердадараш дӏа-хьа эцаш, кхоанарча дешара оагӏонца дикка хувцамаш хилийтара тӏехьа къахьегаш йола моттиг хинна, дӏаэттай «Машук».
«Доаккхал де йиш йолаш да тахан вай цу Оагӏонца бувзам хилар: вай мехкара 500 совгӏа саг «Машука» доазон тӏа ӏомалуш хиннав, республике цу оагӏонцара керда гӏулакхаш доаржадеш, тахан хьаэттача ханага хьежжа болх тоабеш, къахьийгад цар. Царна юкъера дуккхабараш тахан шоай проекташ йоаржаеш ба, хьехамчаш хинна дӏаэттаб, ма дарра аьлча, мехкарча дешара оагӏонца дувзаденнараш тоадеш ба. «Машука» говзанчашца цхьана йоаржаеча проекташка гӏолла; керда болхлой кийчбе, хьехамчий института хӏама тоаде аьттув боал вай», - белгалдир Мехкадас.
Республикан кулгалхочо белгалдир, «Машукаца» бувзам дикка чӏоагӏбаро кагирхой вахарера гӏулакхаш тоадергхилар. Ерригача Россе дешара оагӏонца дувзаденнарашта аьттув болаш моттиг я ала деза цох. Цу Оагӏон тоаба хьинаре къахьега, керда наькъаш доаржаде даькъалайийцар вай Мехкадас.
