«Кхетам» яхача юкъарлонах хӏама довза ловрашта боалача пайдах дийцар Мехкадас
«Кхетам» яхача Российски юкъарлон 5 шу дуз тахан. Вай мехкадас Келаматанаькъан Махьмуд-ӏаьлас белгалдир цу оагӏонца дӏахьор лоархӏаме болх хилар. «Сердалога» из хоам Мехкадаь зарбан болх лелабераша бир.
«Цу юкъа берригача мехкара эзараш лектораш, ладувгӏархой вӏашкаозаш бола оагӏув хиннаб цох. Укх тӏехьарча шерашка итташ лекционни кхетаченаш дӏайихьай ,мехка федеральни оагӏонцара говзанчаш юкъе болаш. Йоаржаеш я тахан «Кхетам. Лекторий», «Кхетам. Паччахьалкхе» яха проекташ. 2025-ча шерарча хана дӏайихьа кхетаченаша чулаьцараш 5 эзар совгӏа саг ва.
Дийша, бехктокхаме, таханарча ханага хьежжа бола нах кхебара тӏехьа лоархӏаме болх ба из», - белгалдир вай мехкадас Келаматанаькъан Махьмуд-ӏаьлас. Республикан кулгалхочо иштта теркалдир, тахан вай мехка культуран, исторе, ӏадатий оагӏонашка лоархӏаме проекташ йоаржаеш бола, доккхача лерхӏамашка, толамашка кхача гӏерта кагирхой хилар.
Иштта гӏулакх дӏахьочар оагӏув мехка массахана хьаллоацаргба. Келаматанаькъан Махьмуд-ӏаьлас, цу балха юкъе дакъа лоацаш, хьинаре къахьегачарна: лекторашта, хьалхалаттарашта, доакъашхошта, царца бувзам лоаттаберашта баркал аьлар.
«Кхетам» яхача Российски оагӏон дӏахо кхы а вай мехка хӏама тоадергдола, хьаькъалах бизза бола къонабараш ураоттабергбола лоархӏаме проекташ, керда лерхӏамаш хиларах дог тийша ва со. Пхи шу дизарца даькъалабувц цу оагӏонца къахьегараш!» - белгалдир Мехкадас.
