Россе Турпал - ший зӏамагӏа вола воша дагалоацаш, къамаьл дир вай Мехкадас
Россе ФСБ болхло, подполковник хинна ший зӏамагӏа вола воша Келаматанаькъан Ӏалихан дагалоацаш, къамаьл дир вай мехкадас. Деналах, майралах визза хинна из вайцара къаьста тахан 19 шу доал.
Цхьан кхийнабар вежарий, вӏаший оагӏув хьаллоацаш, нийсагӏа бола никъ харжара тӏехьа къахьегаш. Республикан Кулгалхочо белгалдир, зӏамагӏа вола воша шийна массахана дагавоаллаш хиннилга. Келаматанаькъан Ӏалихан аьннача дош долаш, шийна тӏадилла моллагӏа гӏулакх бехктокхаме кхоачашдеш хинна эздий саг санна ваха висав гаргарча наьха дегашка.
Зулама никъ хоадабарах, Даьхен хӏама, моаршо лораярах ший лоархӏаме декхар хеташ ваьхар из. Терроризм яхача доккхача, бӏехача зулама духьала йоккха операци дӏахьоча наькъ тӏа хилар цун вахар хадар. Россе Президента Путин Владимира РФ Турпал яха цӏи елар цунна; декхараш кхоачашдеш гойтача деналах, майралах.
Ураотташ латтача вай къонача тӏехьенна масал хинна, къаман исторе боча волаш ваха виса саг ва из! Россе Турпал волаш кхалхар хиннача цун цӏи лелаеш я цхьан хана из деша ваьгӏа Шолжа-Шахьарера №4 йола ишкол, хӏара шера вай мехка цун цӏера хетаяь эллиной-румий оалача латарах йола Ерригача Россе яхьаш дӏакхухь. Самаре деналах визза хиннача эпсара цӏи тиллар шахьара бульварах, Келаматанаькъан Ӏалихана тӏехдика дешаш юридически факультет яьккхача Самарски паччахьалкхен университета коа мемориальни улг оттадир.
Келаматанаькъан Макшарипа Ӏалихан массанена вовзаш, ше везийта ховш, яхь, сий, денал яхача хӏамай мах дика бовзаш, лорабеш вар. Цар дезало доаккхал деш да иштта воӏ шоай хилар. Вай мехкадас Келаматанаькъан Махьмуд-Ӏаьлас белгалдир, Россе Турпала цӏи еннар шоай дегашта боарам боацаш веза, хьамсара хинна воша волга, цун беркате гӏулакхаш массахана шоашта хьалхашка латтаргдолга. Дала гешт долда цунна! Дала къахетам баь, ялсмалера вахар лулда цунна!
