503-гӏа сур латтача моттигера хьал тоадар дийхар вай Мехкадас
503-гӏа мотоиччархой сур латтача ваха, цига бахаш болча тӏемхой, цар дезалий хьал миштад тохкаш хилар вай мехкада Келаматанаькъан Махьмуд-Ӏаьла. Республикан кулгалхочо белгалдир ӏалаьмате чехка меттадоаладе деза кхоачамбоацараш. Къаьстта терко йир Мехкадас карарча хана тӏема операце моттигашка декхараш кхоачашдеш латтача бӏухой дезалий оагӏув хьаллацара, царна эшар лоаттадара.
«Бӏухой фусам-ноаной, берий вахарера кхоачамбоацараш меттадоаладар тахан керттерча декхарех да мехка. Цар цӏагӏара нах тахан Даьхен хӏама лорадеш латтача хана, республика хила еза, цар гӏулакхашка хьожаш, эшар, дезар фуд тохкаш. Бераш лагере салаӏа дахийта, ишколе долхача хана эшача кхоачамах дизза тӏормеш дӏадекъа, аьнна, тӏадиллад аз. Уж бахача доазон тӏа, берашта лаьрхӏа моттигаш тоае. Тӏемахой дезалаш республикан юкъарча вахара юкъеоза беза. Мехка дӏакхухьача кхетаченашта, гӏо дарах долча боламашта, вахара оагӏонцарча проекташта юкъе хила беза уж. Цхьаькха лоархӏаме хӏама – цу дезалашкара нах балха увттабе беза. Ишколашка, берий бешамашка, иштта кхыйолча моттигашка, цар караерзаяьча говзалга хьежжа балхаш тӏа дӏанийсбе беза уж», - яздир вай Мехкадас ший телеграм-оагӏон тӏа.
Кхетачен доакъашхоша дийцар вахарерча гӏулакхех: хих, токах, бахача моттигашца дувзаденнарех. Массадолча хӏаманга хьожаш, къувлаш дола кхоачамбоацараш юстардоахаш къахьега, аьнна, тӏадиллад Мехкадас паччахьалкхен, муниципалитета хьакимашта. Республикан кулгалхочо белгалдир, тӏема «городоке» бахача дезалий вахара хьал тоадар, цар гӏулакхага хьожаш хилар тахан керттерча декхарех долга.
