720 бера моттигаш луш йолча ишколе вахар республикан кулгалхо эггара хьалха. Кхо гӀат долча ишколе йоккха спорта, актови залаш, лорий кабинет, кхача кийчбу моттиг, библиотека я. Таханарча хано дӀадеххача тайпара тоаяь я керда ишкол. Масса моттигашка камераш оттаяьй, цӀи яьлча хоам беш дола гӀирсаш дехкад.

ШоллагӀа йола ишкол зӀамагӀа я, цо тӀаэцаргва 540 дешархо. Карарча хана, ков тоадеш боахк болхлой. Ишколашкара хьал миштад хьажа вахача Мехкадас теркалдир спорта хьал.

«Физически культура хьехаш бола нах шоай болх дика ховш, бехктокхаме из дӀахьош хила беза. Спорта гӀулакхех йолча министерствонна тӀадиллад аз, цу гӀулакхага хьажа, аьнна», - белгалдир Мехкадас.

Республикан кулгалхочо иштта теркалдир, Инаркъе хицара гӀулакх чӀоагӀа чоалхане латтилга. «Цу оагӀонцара кхоачамбоацараш юстардахара тӀехьа къахьегаш да тхо.

Ишколашка боаггӀача боараме хий хила деза! ГӀишлон балхех йолча министерствонна тӀадиллад молача хин лаьрхӀа 5 куб чуйода бешка оттае, аьнна. Иштта, цӀерцарча кхерамзлен гӀулакха лаьрхӀа цхьаькха бешка хила еза ишколан коа», - аьлар Келаматанаькъан Махьмуд-Ӏаьлас.