ГӀалгӀайчен Кулгалхо ваха хилар, «НЕОН» яхача гӀишлон гӀирсаш деча комбинате
ГӀалгӀайчен Кулгалхо вахар «НЕОН» яхача гӀишлон гӀирсаш деча комбинате, карарча хана цу даькъ тӀа йоккха инвестиционни проект кхоачашъеш я, Эсенаькъан Хьасана кулгал а деш. Из хоам «Сердало» газетага бир ГӀалгӀай Республикан Кулгалхочун зарбан болх лелабераша.
Карарча хана, Наьсарен кхален Яндарерча комбинате къахьегаш ва 500 саг. Керда болх дӀаболабаро таро лургья 200 балха моттиг хилийта.
Цул совгӀа, комбината керда таронаш юкъейоалаяро, клинкерный оала кирпишк, топпара блокаш, «Poroton» яха яйга кирпишк арахеца йиш я, 40 млн кирпишк хьаергья цига цхьан шера.
Предприятена эшаш дола гӀирсаш хилийтар тӀадиллар республикан Кулгалхочо экономически дегӀаахара Министерствонна.
Иштта мехка Кулгалхочо белгалдир, цу заводе болх беш хургбола говзал йола нах колледжашка кийчбар, иштта таьрахьашца дегӀаахара Академе программисташ а кийчбе беза, яхаш дийцар цо.
«ЛоархӀаме да, наха къахьегарал совгӀа, болх беча наха дика хьалаш вӀашагӀдохкар. Из проект кхоачашъеш, халонаш а нийслу. Из дувзаденна да санкцешца, эша гӀирс лоаттабарца. ХӀанз вай декхар да, хьатӀадоагӀача шера завод болх бе дӀайолаялийтар.
Вай берий бешамаш, ишколаш, дарбанчеш хьалъяь хила еза дикача кирпишках, тӀера хозача хӀамах.
Со тешаш ва «НЕОН» проект ГӀалгӀайчен промышленность дегӀаяра лоархӀаме гӀа ба, цо таро хулийтаргья мехка дикал йола гӀишлон материалаш лоаттае», - аьлар Келаматанаькъан Махьмуд-Ӏаьлас.
