Гӏалгӏайчен Кулгалхочо дӏадийхар, паччахьалкхенна хӏама эцара тӏахьожам чӏоагӏбар
Гӏалгӏайчен кулгалхочо Келаматанаькъан Махьмуд-ӏаьлас коррупцена духьала къовсам лоаттабара кхела кхетаче дӏайихьар. Цига терко тӏаяхийтар паччахьалкхен, доал деча даькъ тӏара хьашташ кхоачашдара леладер къаьга хилийтара. Из оагӏув геттара тӏахьожам лоаттабе безаш я. Керттерчарех дар контракт оттаяра балха тӏахьожам лелабар, иштта коррупце хьал къоастадеча хана, Гӏалгӏайчен УФАСаца айхха бувзам лелабар.
«Къаьстта хьежар йоал яккхара хаттарашка. Паччахьалкхен, доал деча даькъ тӏара доалахьардар йоал яккхара моттигашта чудоагӏаш дий ха деза. Цо таро лургья дӏаязъянза йола моттигаш гучаяха, йоал яккхара болх лерттӏа дӏабахьа, республикан доалахьардар леладеча даькъ тӏара пайда лакхбе. Цу гӏулакха лаьрхӏа вӏашагӏйолларгья боахамашта юкъера тоаба. Иштта дийцар республикан министерствашка кхааш ийдара болх тӏахьожам болаш лелабе безарах. Лоархӏаме да ший ханнахьа юкъе нийслуш дола кхоачамбоацараш гучадахар, иштта из хьалхадоаккхаш хургйола оагӏув хьакхоллар. Лорий урхалленашка дӏахо болх беш хургья «тешама телефон», цу даькъо гойтаргба кхааш ийца хилар белгалдеш бола хоам.
Иштта хьежар Гӏалгӏай УФАСа балхага, паччахьалкхен, доал деча даькъ тӏа хӏамаш эцарга. Ер шу дӏадоладелча денз, цу боахамо цхьацца дола кхоачамбоацараш гучадаьхад. Уж дувзаденна да контракт оттаярца, яхьашка валара хьалаш леладарца. Цу дерриганена боагӏаш бола бокъоно дӏадехача беса мах оттабе беза, бехкебараш бехктокхаме оза беза», - яздир ший телеграмм- оагӏон тӏа Келаматанаькъан Махьмуд-ӏаьлас.
Гӏалгӏайчен Кулгалхочо белгалдир, коррупцеца къовсам лоаттабар Гӏалгӏайчен дерригача ӏаьдалгара дӏадехар да. Из бокъо массанега кхоачаш я. Хӏара кулгалхо бехктокхаме ва, ший боахаме цхьоагӏо хилийта. Керттера маӏан - республикан ахча болх беш хилар, бахархошта лерттӏа пайда а бахьаш, ший дӏадаха дезача оагӏорахьа дӏа а додаш.
