Беркатеча цӏайца бераш, цар даьй-ноаной даькъалабийцар вай мехкадас
Халкъашта юкъерча бераш лорадара Денца даькъалабийцар вай мехкадас Келаматанаькъан Махьмуд-Ӏаьлас. Из хоам «Сердалога» бир мехкадаь зарбан болх лелабераша.
«Хьамсара бераш! Лоархӏаме бола даьй, ноаной! Укх сийрдача, хозача цӏайца даькъаладувц аз шо дег тӏара. Бераш вай массане вахаре эггара дезагӏа дола хӏама да. Вай фусамашка дегагӏоз лоаттаю цар, шоай толамашца дегаш гӏадкхувл», - йоах вай Мехкадас ший къамаьла юкъе.
Республикан кулгалхочо белгалдир, бераш къаман кхоане йолга, хӏаьта хӏара цар толам доаккхал де хӏама долга. Берашта лаьрхӏа вай мехка дукха хӏама хургда дешаре, спорте цар хьалха хила аьттув хургболаш; тахан тайп-тайпара моттигаш хьаеллаш, царна керда наькъаш довзийташ къахьегаш ба мехка.
«Ираз долаш, беркате, толамех дизза хилда вай берий вахар! Могаш, маьрша болаш, гӏозленца, лаьрхӏачунга кхача аьттув болаш, оагӏув хьаллаца гонахьа нах болаш, шоаш безарий дегаш гӏадкхувлаш бахалба уж! Шоай къонгий, йиӏигий ираз гуш, фусамаш йизза беркат долаш, доккхача дикашка кхачара шоай бераш тӏахьехаш бахалба даьй, ноаной. Машар, барт, дегагӏоз латтийла хӏара дезале!» - аьлар вай Мехкадас ший къамаьла юкъе.
