ГӀалгӀайчен Кулгалхочо даькъалайийцар ГӀаьзе-Коара «Нана-турпалхо»
Россе Президента Путин Владимира кулг яздир, Наьсарен кхален ГӀаьзе-Коа яхача Исмейланаькъан Азайна «Нана турпалхо» яха цӀи ялара долча амара. Азас ший вахар хетадир бераш кхедара, хӀаьта цун фусам-да Ахьмад почта болхло ва. Дукха ха йоацаш цар дезале дика кхаъ бера - цхьаькха дезалхо тӀакхийтар. Исмейланаькъан дезале хӀанз 11 бер да. «Нана турпалхо» яха цӀи яларца Исмейланаькъан Аза даькъалайийцар ГӀалгӀай Республикан Кулгалхочо Келаматанаькъан Махьмуд-Ӏаьлас.
«Нана-турпалхо» яхар – паччахьалкхен лакха совгӀат да. ТӀехьарча хана из цӀи елар вай республикан пхе яхархочоа. Царех хӀаране дукха дезал ба, шоай хӀара деннара атта боаца болх а ба, из деррига берашта лаьрхӀа деш да. Дег чура даькъалаювц дукхача дезала Исмейланаькъан фусам, ираз долаш бахалба уж. Бераш дика дийша хилда, укх дунен тӀа шоай вахара дика никъ кораболба царна», - язду республикан Кулгалхочо ший телеграм-канале.
