Мехкадас, Лакхехьарча Суда 32 шу дизарца, даькъалабийцар цун болхлой
1994-ча шера маьтсела бетта 5-гӏа ди, Гӏалгӏай паччахьалкхе хьаоттара исторе лоархӏаме да. Цу дийнахьа, республикан Конституци тӏаийца ши бутт совгӏа ха яьлча, Президента Овшанаькъан Руслана кулг яздир Гӏалгӏай мехка Лакхехьара Суд хьаеш йолча чӏоагӏонна. Юкъара-политически оагӏонца хала ханаш латтача деношка хьакхоллаш яр Лакхехьара Суд; бакъда, хьалхарча дийнахьа денз, сага бокъонаши кортмукъалеи лораяра тӏехьа керттерча кхелахочун гӏулакх дӏатӏаийца, болх дӏахьош я.
«Тахан лакхача боараме шоай болх дӏахьош, наьха тешам хургболчча тайпара къахьега хьожаш ба Лакхехьарча Суде», - белгалдир вай мехкадас Келаматанаькъан Махьмуд-ӏаьлас ветеранаш, карарча хана балха тӏа бараш даькъалабувцаш. Республикан кулгалхочо теркалдир, Лакхехьарча Суда оагӏонцара моттиг хьакхоллар вай мехка чӏоагӏа эшаш, хӏама тоадара тӏехьа лоархӏаме хиннилга. Къаьстта баркал кхайкадир мехкадас республике цу балха хьалха лаьттарашта.
Цар къахьегамца атта ца хиннача 90-ча шерашка Бокъон хӏама боаггӏача боараме лорадар, лархӏар хьаэттар мехка. Хӏара денна хьинаре къахьегаш, шоай гӏулакх лерттӏа дӏадахьа хьожаш, балхацара декхараш дизза кхоачашдеш бола Лакхехьарча Суда болхлой могаш, маьрша болаш, аьттонца, тахан санна шоай болх безаш, лоархӏаш дӏахо дӏабаха даькъалабийцар вай мехкадас!
