Республикан Денца КБР бахархой даькъалабувцаш хилар вай Мехкада
Гӏаьбартой-Балкхарой республиканна хьалхалаттача Коков Казбекага, Республикан Денца беррига бахархой даькъалабувцаш, къамаьл дир вай мехкадас Келаматанаькъан Махьмуд-Ӏаьлас. Хӏара денна шоай республикан хӏама тоадара тӏехьа къахьегаш болча КБР бахархошта из ди доккха, лоархӏаме долга белгалдир Мехкадас.
«Гӏалгӏай, Гӏаьбартой-Балкхарой республикашта юкъе тхьоврарча хана денз барт, лерхӏам, безам хиннаб. Массахана вӏаший оагӏув хьаллоацаш, гӏо деш хьадаьхкад вай. Дог тийша ва со, из бувзам хӏара шера кхы а дикагӏа чӏоагӏлургхиларах», - аьлар цо.
Иразе, беркатаца, аьттонца, хӏара шера шоай къаман хӏама дикагӏа тоадарца къахьегаш баха даькъалабийцар мехкадас лоалахой. Доккхача дикашка кхача, республикан хӏама хӏара денна тоадеш хила аьттув хилба шун! Могаш-маьрша долаш, хӏара фусаме барт, дегагӏоз йолаш, хилда массане вахар!
